Фејсбук на својот блог деновиве објави листа на најпопуларни видео игри кои се играат на оваа платформа. Видео играта Top Eleven - биди фудбалски менаџер во категоријата хол на славните е избрана меѓу најдобрите пет постари видео игри, лансирани пред 2014 година, а кои се играат на оваа социјалната мрежа. Со тоа и се оддаде признание на српската компанија Нордеус која е и креатор на видео играта Top Eleven Be a Football Manager (единаесетте најдобри – биди фудбалски менаџер).
“Знаеме дека играта е квалитетна и свесни сме за нејзината популарност, но бидејќи немавме никакви индикации кого фејсбук ќе го одбере, можам да кажам дека сепак сме пријатно изненадени”, изјави Милан Џукиќ, одговорен за односи со јавност во Нордеус.
Играта беше лансирана во 2010 година. Се работи за игра во која играчот е во улога на фудбалски менаџер којшто формира свој тим со купување и продавање на играчи. Играта брзо ги освои љубителите на спортот и компјутерските играчи. Џукиќ верува дека клучно за успехот на оваа игра е тоа што креаторите на играта понудија комплексна игра што можеше освен на десктоп да се игра и на мобилните телефони.
Top Еleven може да се игра на повеќе платформи: на мобилен телефон, на таблет, на компјутер или на киндл. Интересно е и тоа што играта може да започне да се игра на еден уред, а да се продолжи на друг во што нашите програмери беа пионери вели Џукиќ.
Пред две години ја играа два милиони, а денес над 5 милиони луѓе во светот ја играат дневно, или 12 милиони активни играчи на месечно ниво, што ја прави најпопуларна онлајн спортска игра за повеќе платформи. Компанијата Нордеус пред 5 години ја основаа тројца програмери, кои напуштаа сигурно работно место во Мајкрософт во Данска. Малата иновативна компанија со неколку луѓе и скромни почетни средства, т.н. старап, прерасна во озбилна компанија со 160 вработени. Само во Белград работат 100-тина меѓу кои и 20-тина странци. Останатите работат во канцелариите на Нордеус во Скопје, Даблин, Сан Франциско и Лондон. Нордеус е еден од петте најголеми партнери на Фејсбук. Не се размислува за продажба, туку само за работа на проекти во кои ќе уживаат сите.