Почитувани,
Имам само пофалби и две прашања до Вас:
1. Го имам изработено 250W V-MOS засилувач од ЕМИТЕР 11/99 и 12/99 и многу сум задоволен од него. Сега ме интересира дали кај него може да се постават повеќе излезни транзистори, за да се добие моќност 400-500W и дали притоа треба да се направат некои измени?
2. Сакам да го изработам засилувачот со LM3886 од Е7-8/04 заедно со филтер засилувачот за сабвуфер со TDA 7294 од Е9/03. Ме интересира дали може да ми прави некој проблем ако користам едно трафо (300W, 2x26V) за напојување на двата засилувачи?
Поздрав,
Јовица Даниловски од Ресен

1. Како прво да ви кажам дека ми е многу мило што сте го изработиле токму овој засилувач кој не е така евтин, и дека сте задоволни од него. Во принцип, секој квалитетен засилувач е конструиран како таков за да ги даде крајните перформанси по многу испитувања и модификации. Едноставно поврзување на паралелни излезни транзистори секако нема да биде она што конструкторите на овој засилувач го планирале, а поголеми зафати на истите ППК се неможни. Овој засилувач има своја 50, 500 и 1000W верзија. Овие засилувачи од 500W и 1000W ги немам изработено и затоа досега не се објавени во ЕМИТЕР. Тогаш кога ќе бидат проверени во практиката од наша страна, ќе ги објавиме во ЕМИТЕР со што секој заинтересиран со доволни познавања ќе може да ги изработи.
2. Трансформаторот од 300 вати, кој го имате, слободно може да го користите за напојување и на двата засилувачи, бидејќи по напон и моќност потполно задоволува, но сепак секој засилувач нека има посебен насочувач со свои филтерски кондензатори.
Драган Јовановски