Здраво ЕМИТЕР!
Ми треба помош во врска со PLL-колото LM567, за кое во ЕМИТЕР 6/04 на стр. 51 имаше неколку едноставни шеми.
1. ТОНСКИ РЕЛЕЈ (слика 3). Дали може 2 или повеќе исти склопа да се поврзат на едно исто напојување? Не ми е јасно дали ќе си пречат еден на друг и во врска со нагодувањето на која влезна фреквенција да работат ако користат исто напојување? Ако немаат никакви конфликти како и со кој стабилизатор да ги поврзам, бидејќи ако има промена на напонот да не се измести влезната фреквенција?
2. Дали од ОСИЦИЛАТОРОТ СО ДВЕ ФРЕКВЕНЦИИ со LM567 (слика 1) неговите две излезни фреквенции може да ги користам за влезовите на ТОНСКИОТ РЕЛЕЈ. и, исто така, дали може на едно напојување да ги поврзам ТОНСКИОТ РЕЛЕЈ и ОСИЦИЛАТОРОТ СО ДВЕ ФРЕКВЕНЦИИ?
Ви благодарам однапред :+)
Иван Ташков
1. Досега во литературата не сум сретнал можен проблем како што вие претпоставувате дека повеќе такви склопови поврзани на едно напојување можат меѓусебно да си пречат. Но, работејќи со овие кола сум среќавал проблеми слични на овие кои вие ги наведувате, но не поради тоа што биле напојувани од едно место. Бидејќи не знам што конкретно ќе претставува вашата комбинација од овие кола, ќе ви одговорам паушално.
Слободно можете да користите два или повеќе склопови, како што е тонскиот релеј, на исто напојување без да имаат меѓусебни пречки. Ако користите трансформатор од 12 волти и соодветен исправувач, напонот што ќе се добие ќе биде околу 16,8 волти. Потоа со стабилизатор 7809 ќе добиете стабилни 9 волти кои ќе ги користите само за напојување на LM567 (извод 4), додека релеите (12 волтни) ќе ги напојувате од оние 16,8 волти.
2. Колото прикажано на слика 1, дадено како апликација, не сум го комбинирал со колото во коешто LM567 работи како тонски релеј, но не би требало да има никаков проблем во исправноста на таквата комбинација. Доколку ја користите оваа комбинација, ќе мора да користите два посебни спроводника за пренос на сигналите од склопот на слика 1 до склоповите на слика 3. Инаку, сите овие склопови можат да се поврзат на исто напојување.
Драган Јовановски