Здраво Емитер!
Сакам да Ве прашам дали е можно да го поврзам лаптопот со телевизор Горење, стар 23 години, за да можам да гледам филмови од лаптопот на ТВ-екранот. Лаптопот има ATI Radeon HD 3470 512 MB RAM графичка картичка, DVI и VGA out порти, додека ТВ има SCART влез.
Однапред ви благодарам за помошта.
Слободан Паризоски.

Доколку и успеете да најдете соодветен адаптер, не е сигурно дека ќе можете да видите слика на ТВ. Проблемот е во тоа што повеќето стари телевизори не се компатибилни со видеосигналот од графичките картички. Зависи од модел до модел. Јас имам еден стар SAMSUNG (моментално фаќа прашина кај моите), произведен 1988, на кој никако не можам да пуштам слика од компјутер.
Пробајте, само ако адаптерот чини многу, може да биде промашена инвестиција – да нема слика, а може и да се добие слика, ама со слаб квалитет. Значи - ЛОТАРИЈА.
Совет – купете си нов телевизор или барем ДВД-плеер со SCART излез. Плеерите ги има веќе од 1800 денари па нагоре.
Зоран Ивановски

МОЖЕ, само не сум сигурен колку ќе биде квалитетна сликата. Јас го поврзав S-VIDEO излезот од PC на SCART на ТВ. На SCART ќе се поврзе и аудиоизлезот од PC за да може да се слуша и звукот. Јас користам кабел како на сликата на линкот http://images.maplin.co.uk/full/l26aj.jpg, додека за вас ќе треба ист таков кабел само место за S-VIDEO треба да одберете за VGA излез. На следниов линк http://www.plugpctotv.com може да селектирате кои излези ги има на компјутерот а кои влезови на телевизорот, па ќе добиете резултати на производи кои се користат за такво поврзување.
Поздрав,
Благоја Пулчески

За да гледате филмови на тв-екранот поребно е да го поврзете видеоизлезот од лаптопот со видеовлезот од ТВ-приемникот и аудиоизлезот од лаптопот со аудиовлезот од ТВ-приемникот. Како што можам да видам од податоците за графичката картичка што ја поседувате, нема соодветен излез од неа што одговара на влезот во ТВ-приемникот!! Со други зборови, тоа би значело дека решението е во набавка на нов ТВ-приемник кој што ќе има ПЦ-влез.
Влатко Костадиновски