Здраво Емитерци!
Јас сум ваш редовен читател и сакам да ве прашам нешто во врска со мојата гитара. Сакам да знам дали може акустична гитара да се преправи во електрична гитара. Можеби ова е смешно прашање, но сакам да знам дали може така, бидејќи немам пари за електрична гитара. Мојата акустична гитара е стара и беше многу скапа кога ја купив, па да не трошам пари за нова електрична гитара.
Ве прашувам вас како познавачи за секакви работи.
Поздрав, Стефан Василевски.
Препорачувам три начини за да добиете електрична гитара од акустична:
1. Да ѝ вградите микрофон и предзасилувач на акустичната гитара. За оваа намена постојат посебни пиезо-микрофони кои се лепат на телото на гитарата, но за проба може да експериметирате и со обичен (поквалитетен) електрет микрофон. Предзасилувачот можете да го купите или, пак, да го направите самите (во ЕМИТЕР имало проекти кои би можело да се употребат за оваа намена).
2. На акустичната гитара да ѝ вградите пик-ап, потенциометар и џек од електричната гитара, а наместо пластичните/месинганите жици да поставите челични жици (жици за електрична гитара). Овие делови може да се купат посебно во продавниците за музикалии. Пикапот (магнетот) може да го направите и самите ако на плоснат правоаголен магнет му намотате неколку илјади навивки од тенка бакарна жица.
3. Од акустичната гитара да го извадите вратот и кобилицата, од даска или иверица да направите тело за електрична гитара, па сите делови да ги монтирате на него. Тука треба да се внимава да се запази истото растојание од кобилицата до првиот праг на гитарата (во спротивно гитарата нема да може да се наштима), а секако и да се употребат челични жици, соодветни пикапи, преклопник, потенциометар и џек за електрична гитара поврзани на правилен начин. Од вашата умешност во изработката на телото, прицврстувањето на вратот и поставувањето на останатите елементи ќе зависи колку убаво ќе изгледа и како ќе звучи вашата гитара.
Користејќи го токму последниов метод јас пред повеќе од 20 години имам изработено неколку електрични гитари кои изгледале и звучеле повеќе од солидно. Со тие гитари рок-бендот на брат ми стигна до полуфинале на Рок фестот :-)).
Ви посакувам успех.
Слободан Таневски