Почитувана Редакцијо,
Сакам да ви поставам неколку прашања на кои се надевам ќе ми одговорите:
1. Дали со интегрираното коло ICL7107 со уфрлување на четвртиот дисплеј може да се добие дигитален волтметар кој ке биде со широко мерно подрачје, на pr: 0-60V , 0-100V, и доволно прецизен тоа да го покажува со една децимала на пример: 3,5V или 24,7V. Ако е можно објаснете ми како, и на кои пинови се поврзуваат сегментите од четвртиот дисплеј.
2. Имате ли некој проект за дигитален амперметар прецизен до 2-3 A?
3. Мислам дека дигиталниот фреквенцметар кој се користи во функцискиот генератор од ЕМИТЕР 1/03 склопен на PPK803 може да се користи и како посебен фреквенцметар со посебно симетрично напојување и влез за фреквенција на Fin и COM. Ако сум во право, кажете ми која е максималната амплитуда на влезниот сигнал, и дали можат да се користат други дисплеи со заедничка анода или катода?
Однапред Ви благодарам за вашата соработка. Поздрав од вашиот верен читател,
Перица Јакимов,
Свети Николе.
1. и 2. Интегрираното коло ICL 7107 е LED 3½ дигит A/D конвертор, што значи дека со него можете да мерите напони до 200 волти со точност до една децимала (поточно ±199.9V). Со соодветен конвертор, истото коло може да се искористи и за мерење на други, електрични или неелектрични, величини. Конкретно, за изработка на дигитален амперметар потребен е конвертор од струја во напон и дигитален волтметар со ICL 7107. Комплетна електрична шема на дигитален волтметар со ова интегрално коло, заедно со сите потребни упатства за изработка и нагодување како и распоред на неговите изводи ќе најдете во ЕМИТЕР бр. 9/97. Во Февруарскиот број од 1998 година истото коло е искористено за изработка на дигитален термометар, а во бројот 10/98 за милиомметар, додека пак во првите три броеви од 1999 година во склоп на проектот "Напонски извор LSP-95" беше прикажан комбиниран волтметар/амперметар кои резултатите ги прикажува со 3 цифри со точност од едно децимално место.
3. Имате право - дигиталниот фреквенцметар во генераторот на функции FG - 95 е склоп кој може да се користи и како самостоен уред, со биполарен влезен сигнал чија што амплитуда треба да биде помала од напонот на напојување на влезниот компаратор. Пожелно е да се додаде и соодветен влезен степен со голема влезна отпорност и заштита од преголеми сигнали. Граничната фреквнција на фреквенцметарот е одредена со шестоцифрениот дисплеј и изнесува 1MHz. За мерење на повисоки фреквенции треба да се додаде прескалер (делител на фреквенции), а такво коло ќе објавиме во некој од следните броеви. Исто така, ќе објавиме и комплетен фреквенцметар во чија основа ќе биде фреквенцметарот од функцискиот генератор FG-95.
Дисплеите можат да бидат од било кој тип, но со заедничка катода. При евентуална замена на типот на дисплеи даден во пописот на потребен материјал можеби ќе треба да ги смените и вредностите на отпорниците за ограничување на струите низ сегментите.
Георги Ефтимов
Почитувана редакцијо на списанието ЕМИТЕР,
Многу ми се допаѓа вашето списание и само продолжете така. Не мислам дека треба да менувате било што во списанието драстично, но еве што јас мислам дека ќе го направи поубаво.
Не ги делете страниците на страница црно-бела и страница колор. Остава лош впечаток кога некои страници со реклама се во боја, а некои не или кога еднаш страната во колор е на десната страна, а другпат на лево. Внимавајте на складноста на боите. Внимавајте на добрата поставеност на текстот и односот на заглавните (големите) букви, не оставајте празен простор.
Намалете ги страниците за најмладите, каде што давате енциклопедиски податоци за познати личности. Сметам дека ова списание не е книга и не треба да се занимава со објаснувања на животните патишта и достигнувања на луѓе кои не се поврзани со науката. Јас мислам дека многу поинтересно ќе биде ако објавите текст во кој ќе објасните за: најновите откритија за структурата на атомот (на пример), примената на најновите математички постапки во решавање на проблемите, новите погледи кон старите физички закони. Ако пишувате за медицината, напишете за структурата на клетката и процесите на метаболизмот во неа или за најновите откритија за лекување на старите или нови болести, со еден збор – пишувајте за најновото и дадете инспирација со проблеми кои не се решени, се тешки за решавање, мистерии, да се развива истражувачкиот дух кај вашите читатели. Впрочем, јас мислам дека сите кои го купуваат ова списание го купуваат затоа што сакаат да научат нешто ново, да направат нешто ново, да бидат инспирирани и поттикнати да размислуваат.
Горан Паликаров, Струмица
Ви благодарам за пофалните зборови и предлозите. Бројот на страници во боја е диктиран од цената на печатење (ако ставиме повеќе страници во боја цената ќе биде повисока), а нивната распределеност во списанието зависи како од содржината на страниците така и од рапределбата на страниците на печатарските табаци. Затоа не е можно да имаме повеќе страници во боја, ниту пак, секогаш две соседни страници да бидат во боја.
Темите за написи што ги предлагате се прифатливи и се вклопуваат во плановите на редакцијата, со една напомена дека сепак, заради најмладите и оние кои допрва влегуваат во светот на науката и техниката, ќе треба да имаме и написи со "енциклопедиски податоци" за животот и откритијата на познатите и помалку познатите научници, за развојот на науката и техниката, за некои занимливости од науката и т.н.
И јас искрено верувам дека нашите читатели се луѓе што сакаат научат и направат нешто ново и дека ЕМИТЕР е нивен поттик и инспирација во нивните настојувања.
Слободан Таневски
Здраво,
Одамна ви немам пишано ... ама еве се појави прилика да ви пишам
1) честитки за изгледот на списанието ... навистина е екстра
2) ме интересира формата на сигналот кај композитното видео ... она што иде со помош на двожилен оклопен капен и со класични буксни... таму внатрешниот дел е податоци за видео, а надворешниот земја или ... ???
Владислав Бидиков
преку e-mail
Луминентниот сигнал (сигналот за осветлувањето) заедно со хроминентниот сигнал (сигналот за бојата) и импулсите за синхронизација, спакувани во еден заеднички сигнал го сочинуваат композитниот видео сигнал. Грубо земено, фреквентниот опсег на овој сигнал изнесува 5MHz и за негово пренесување се користи класичен коаксијален кабел со импенданса од 75 . Секогаш оклопот е поврзан за "масата", а на внатрешниот проводник постои корисниот сигнал.
Дејан Трпески
О.К. сега ми стана појасно, но имам едно трик прашање имам видео композитен, и 2 канала аудио и сите имаа свој оклоп дали е безбедно сите да се спојат заедно т.е да се користи 4 жици за 3 канали .. или ова може да има некои несакани последици ... и сл ...
Владислав Бидиков
преку e-mail
Оклопот кај сите коаксијални кабли е "маса" што значи дека тие се поврзуваат на една иста точка во уредот. Меѓутоа заради намалување на мешање на сигналите не се препорачува сите 3 сигнали (видео + 2 аудио) да одат низ еден коаксијален кабел со три жици и еден оклоп туку секој сигнал да оди низ свој коаксијален кабел со свој посебен оклоп.
Поздрав,
Слободан Таневски
Јас сум ваш нов читател и како прво сакам да кажам дека списанието е супер. Во рубриката "Писма" понекогаш има навредливи содржини, но не обрнувајте внимание на тоа. Содржината на ЕМИТЕР е добра но, треба да има и простор за физика, бидејќи сум заинтересиран за неа. Ве молам напишете нешто за Теоријата на релативитетот.
Поздрав за сите во редакцијата и успех за списанието Ви посакува,
Христијан Кировски,
Куманово
Ви благодарам на пофалните зборови и поддршката. Физиката повремено е застепена во списанието, а наскоро очекувајте и еден напис на тема "Теорија на релативитетот".
Слободан Таневски