Почитувано редакцијо,
Ве поздравувам многу и имам едно прашање:
Го изработив ESR-метарот од ЕМИТЕР 2/2000 и со кондензатори над 200µF покажува максимален отклон односно 0оми иако кондензаторите се со различна вредност и старост. Во што е проблемот?
Благодарам однапред,
Никола Митрески
ESR метарот не е капацитет-метар да дава различни отклони за секој различен капацитет. Затоа не се зачудувајте што дава исти отклони за различни капацитети, особено за тие над 200µF. ESR метарот треба да дава различни отклони само при различна состојба на електролитот во кондензаторот. Ако кондензаторите кои сте ги мереле, без поголемо влијание на нивниот капацитет, имале "свеж" електролит, отклонот ќе биде максимален, односно еднаков на "0", затоа што сериската отпорност на електролитот заради неговата добра проводливост е мала, односно нула. Ако одберете кондензатори со постар датум на производство, со сигурност нивниот електролит ги има изгубено своите проводливи способности, па ќе очекуваме зголемување на сериската отпорност и намалување на отклонот и капацитетот. Падот на сериската отпорност е помалку изразен кај кондензаторите со поголем капацитет и покрај нивното стареење во компарација со кондензаторите со помала капацитатитвност. Значи, два кондензатори со ист датум на производство, од ист произведувач, со иста технологија на производство, изглед и начин на чување, а различен капацитет: на пример: 10µF и 200µF, после одреден период од на пример: 5 год. иако игубиле еднаков процент од "свежината" на електролитот, ќе покажат различен отклон кој ќе биде помал кај кондензаторот со помал капацитет. Значи кондензаторите со поголем капацитет треба многу повеќе да се "исушат" за да настане видливо зголемување на ESR факторот.
Исто така, зголемувањето на сериската отпорност, т.е. намалување на отклонот со стареењето на електролитот во кондензаторот е поизразено кај кондензаторите со поголем деклариран номинален напон. Заради потребните поголеми изолациони својства на електролитот во кондензаторите со повисок номинален напон, "сувоста" на електролитниот расатвор во кондензаторот кај овој тип на кондензатори е поизразена и побрзо го зголемува ESR со стареењето. Токму затоа, "locus minoris resistance" (слаба точка) во мрежните претворувачи т.н. switch-ери, се кондензаторите со помал капацитет а повисок деклариран напон. Кога испитувате кондензатори за нивниот ESR, започнете со испитување на малите електролити по капацитет и димензија (помало количество не електролитска течност) кои имат повисок деклариран напон. Сигурно дека потешко ќе го променат ESR големите електролити од 1000-2200µF на излезот од напојувањето кои се за напон од на пр. 12 V во споредба со електролитите во осцилаторот со капацитет од 1-10µF а напон од 250-400V. Кондензаторите кои се поблиску до извор на топлина, на пр. до тело за ладедње или трансформатор, побрзо го влошуваат ESR факторот.
Заклучок: Кога мерите ESR на кондензатори, мерете и споредувајте кондензатори кои имаат ист ред на големина на капацитетот и приближно ист деклариран напон. Кондензаторите со помал капацитет, помали физички димензии и поголем номинален напон се понеотпорни на "стареење", односно губат процентуално поголем дел од својот капацитет, отколку кондензаторите со поголем капацитет, поробустни димензии и помал номинален напон , особено т.н. струјни електролитски кондензатори.
Инаку, според кажаното од ваша страна, инструментот е во потполна исправност.
Петар Аврамовски
Почитувана Редакцијо! Имам два проблеми кои се надевам дека ќе можете да ми помогнете да ги решам.
1. Дали знаете како можам да осветлам LCD Display. Поточно, станува збор за LCD Display од дигитален брзиномер од велосипед. Јас пробав со поставување на LED диоди паралелно на дисплејот, но светлината поминува низ него и излегува на другата страна. Притоа ни еден дел од дисплејот не го осветлува. Ова ми беше инспирација од дисплеј на мобилен телефон, но дали е ова возможно и на овој дисплеј да се постигне?
2. Како би можел да поврзам флуоресцентна цевка (неонка) на 12V еднонасочна струја? Бидејќи немам сретнато во ЕМИТЕР ваква шема доколку има ќе ве молам да ми го посочите бројот на списанието. Дали би можел да ја искористам електрониката од светлата кои се користат кога нема напон во објектот и се вклучуваат на напон приближно 4V, а светат неонки од 8W. Ако ова е возможно дали би можел да ја зголемам моќноста на 60W. И за крај, доколку имате решение за ова или готов проект (шема) би ви бил многу благодарен доколку ми ја испратите на и-меил или ја објавите во некој од следните броеви на ЕМИТЕР!
Со почит, Борче Костовски
1. Претпоставувам дека дисплејот кој го има мерачот на брзина од велосипед е од рефлексен тип, што значи дека најдобро работи со светлина која упаѓа од надвор, и притоа најдобро е светлината да биде нормална на предната површина на дисплејот. Оваа светлина се одбива од рефлексната подлога позади стаклото со течен кристал и се враќа кон предната површина на дисплејот. Патувајќи низ "сендвичот" од стакло и течни кристали, светлината различно се поларизира и на тој начин се формираат сенки на местата каде поларизацијата е под агол од 90 степени. Овие сенки се користат за испишување на потребната информација на дисплејот. Ова во најкратки црти е принципот на работа на овие дисплеи.
Кај рефлексните типови на дисплеи со течен кристал светлината треба да помине два пати низ "сендвичот" (еднаш од предната површина кон рефлексниот слој и уште еднаш рефлектираната светлина се враќа од рефлексната површина кон предната страна на дисплејот). Ова значи дека ако на ваков дисплеј му уфрлите светлина од некоја друга страна нема да работи добро. Друга причина може да биде и типот на рефлексната површина на дисплејот која кај мобилните телефони е релјефна и е со бела боја. Овој рефлексен слој не само што ја рефлектира светлината, туку и ја дисперзира што е потребно за рамномерно осветлување на дисплејот. Уште една причина која може да биде причина за неуспех кај вас е и бојата на употребените светлечки диоди. Посебно ако сте употребиле сини лед диоди голема е веројатноста да нема успех. Ова се должи на тоа што некои дисплеи со течни кристали не ја поларизираат сината светлина и изгледа како дисплејот да не работи. Ова може да се одреди по тоа што овие дисплеи кога ги гледате на сончева светлина имаат пурпурно-темносин сјај. Ако станува збор за ова, употребете портокалови или зелени светлечки диоди и успехот ќе биде загарантиран.
2. За да започне неонската светилка да работи потребно е да настане јонизација на гасот кој се наоѓа во цевката (кој не е неон, туку е мешавина од повеќе гасови). Ова се постигнува со иницирање на гасот со напон од околу 1000V, а потоа за да се одржи јонизацијата потребен е напон од околу 180-200V. Станува збор за флуоресцентни цевки кои се со должина од 1,2m и се предвидени за работа на 220V наизменичен напон. За да започне ваква цевка да работи на 12V потребна е соодветна електроника со која од овој напон ќе се добие наизменичен напон со доволно висок напон. Ова може да се постигне на повеќе начини, но наједноставен е со употреба на мрежен трансформатор на кој му се менуваат улогите на примарот и секундарот. Така се одбира трансформатор со однос 12V/220V и на намотките за 12V се носи наизменичен напон од осцилатор предвиден за таа намена. Ова е само идеја како да се изработи едноставен инвертор, за деталите околу неговата изработка ќе треба да почекате за да се реализира проект со слична намена кој, се разбира, ќе го објавиме во ЕМИТЕР.
Што се однесува до електрониката која ја споменувате, се разбира дека може да се употреби електрониката која е предвидена за активирање на флуоресцентни цевки, но треба да се запази моќноста на цевката. За жал, не може на електроника предвидена за побуда на цевка од 8W да поврзете цевка од 60W. За да се оствари ова треба да се промени трансформаторот кој е поставен во електрониката како и драјверскиот дел за него. Сепак, оваа постапка не е воопшто едноставна и не би ви препорачал да ја правите. Многу поедноставно ќе биде да направите нова електроника која ќе биде предвидена за побуда на флуоресцентна цевка од 60W. Моментално не можеме да ви испратиме шема за оваа проблематика, но во иднина ќе се потрудиме да направиме проект во ЕМИТЕР за оваа намена.
Благој Ќупев
Почитувана Редакцијо на ЕМИТЕР,
Имам прашање во врска со еден проект кој е објавен во постарите броеви на ЕМИТЕР и се надевам дека ќе ми помогнете. Се работи за тајмерот VKT – 01 (број 3/2к - март 2000 г.).
Прашањето е дали може некако да се изведе LED диодите на тајмерот да не се гасат откако ќе истече времето кое е дефинирано за една диода. На пример, ако имаме сетирано да исклучиме некој уред за 100 мин. (периодата е 10 мин.), и ако поминатото време откако сме го активирале тајмерот е 60 мин., да светат првите 6 диоди со што мислам дека ќе имаме подобра визуелна индикација на времето кое ни преостанува до исклучувањето на уредот. Така на овој пример ќе знаеме дека времето кое ни преостанува е 40 мин. Ме интересира дали тајмерот ќе се усложни повеќе, односно дали ќе треба да се употреби некое друго IC на местото на CD 4017 или, пак, некое друго дополнително коло.
Ви благодарам однапред и се надевам дека бев јасен,
Поздрав од Александар
За жал, нема едноставна замена на коло кое би се поставило наместо CD4017 со кое би добиле приказ на LED диодите како што ви треба вас. Ниту, пак, има едноставна изведба на тајмер на кој приказот на изминатото и преостанатото време ќе биде според вашето барање. Може нешто слично да се направи со употреба на CD4511 и CD4518, каде на седумсегментен LED дисплеј ќе се прикаже колку проценти од поставеното време е поминато. Ако сте заинтересирани за ова решение, контактирајте со нас за да ви испратиме идејно решение како тоа да се изработи (идејно затоа што не може да ви испратиме комплетно решение кое може едноставно да го изработите и да проработи од прва). Или, пак, можеби во некој следен број на ЕМИТЕР и ќе објавиме нешто слично.
Благој Ќупев