Здраво до Редакцијата и уредникот.
Јас сум редовен читател на ЕМИТЕР и имам прашања во врска со универзалниот далечински управувач од ЕМИТЕР бр.02/07. Потребниот фајл ми го пративте, уредот е направен и сè е како што треба, се програмира како што треба, но приемникот работи кога и како сака тој. Од пишаното во шемата ништо не е верно. Дали има разлика од какво далечинско се управува, дали има некоја друга финта или нешто слично, но не работи ама никако, барем да работеше само еден канал како што треба и толку ќе бев задоволен. Прилично е доста голем влог за ваква неправилна шема или јас пак некаде грешам. Мислам дека немам никаква грешка, бидејќи се работи за hex-фајлот што ми го пративте, а плочката е изработена на највисоко ниво. Би ве замолил, ако може, да ми посочите каде е грешката или, пак, да ме поврзете со конструкторот на оваа шема.
Ви благодарам однапред,
Влатко Рујаноски
Сè што е напишано во написот за универзалниот далечински приемник е верно!!! Во текстот фино е напишана постапката за негово програмирање и доколку се придржувате до неа нема да имате никаков проблем. Друго, јас не го измислив тој проект, туку само практично го реализирав и притоа, а и во текот на тестирањето, не се соочив со никаков проблем. Користев универзален далечински управувач "SUPERTEL" кој за таа намена беше програмиран да работи како за ТВ-приемник SAMSUNG, а го имам испробано и со далечински управувач PHILIPS и GRUNDIG и сè беше во ред. За ова што сум пробал гарантирам, а за некои други далечински управувачи не можам да тврдам дека уредот правилно ќе работи, но би требало тој да работи правилно со кој било далечински управувач што работи според RC5 протоколот.
Влатко Костадиновски
Здраво ЕМИТЕР.
Со помош на списокот на содржини кој ми го испративте, избрав да купам околу 100 броеви, па сакам да ми кажете вкупна цена за нив. Исто така, ме интересира дали може да ми пратите само одредени содржини од списанијата (не целосен примерок) и ако може тогаш пишете ми за да ви набројам кои содржини од кој број.
Инаку, јас сум електричар и 3 години работам како монтер и сервисер за алармни уреди од "DSC", уреди за надзор и уреди за безжична комуникација од CISKO SYSTEMS, како и монтер на електрика во станбени згради во Струмица. Покрај ова, навистина сум заинтересиран и за електронски уреди, па може да се каже дека сум ваш колега :)
Токму затоа сакам да знам дали имате микробушилки за електронски бакарни плочки и да ми кажете со што е најубаво да се цртаат истите и со кои хемиски течности се нагризуваат и за колку време. Јас ги цртам со алкохолен маркер, а за нагризување купувам готова хемикалија, но не сум задоволен многу како излегуваат моите плочки.
Голем поздрав до вас и благодарам на соработката и вниманието.
Ѓорѓи Емљаков од Струмица
За пофалба е вашиот голем интерес за ЕМИТЕР, па затоа за толкава количина на стари броеви ќе ви одобриме попуст од 30%. Точната вкупна сума зависи од тоа кои броеви ги имате избрано.
Поединечни написи не испраќаме поради неколку причини:
- за да испратиме само еден напис треба да го искинеме примерокот и така да го уништиме;
- продавањето на поединечни написи е во спротивност со издавањето на списанието: ако дозволиме секој читател да си нарачува само одделни написи, тогаш ќе треба да престанеме со издавање на ЕМИТЕР, бидејќи тоа ќе стане неисплатливо;
- продавањето на одделни написи, иако навидум е во полза на читателите, тоа сепак не е така: често ќе се случува некој отпосле да има потреба и за друг напис од истиот број, па во таков случај ќе излезе за два написа да плати колку за цел број.
Иако во овој момент можеби ве интересираат само одделни написи од секој број, земете ги целите броеви, бидејќи сум убеден дека во нив ќе најдете барем уште неколку написи кои ќе ви бидат интересни и потреби, ако не во овој момент тогаш во некоја блиска иднина.
Цртањето и изработката на плочките со печатени кола (ППК) во аматерски услови може да се направи на различни начини: со алкохолен фломастер (опишано во ЕМИТЕР 7-8/97 и 4/06), со самолепливи ленти (Е 12/99), со фотопостапка (Е 4/98) и со пренос на тонер од ласерски печатач (Е 4/06). При тоа може да се користат различни киселини за нагризување, што исто така било објаснето во спомнатите написи. Дизајнот на шемата и ППК може да се направи рачно или со соодветна компјутерска програма: со Corel DRAW (види во Е 4/99 и 11/03), со Protel (ЕМИТЕР 1, 2 и 3/98), со Eagle (ЕМИТЕР 2, 3 , 4 и 5/06) или со некоја друга.
Плочките најдобро е да се дупчат со моделарски дупчалки кои имаат голем број на вртежи и се со моќност од 20 до 100 W. Такви дупчалки можете да набавите во продавниците за електронски материјали или во продавниците за електрични алати.
Со надеж дека ви помогнав, срдечно ве поздравувам.
Слободан Таневски