Аускултација претставува суверено најстара дијагностичка метода. Со неа се наслушуваат звуците што доаѓаат од внатрешноста на човечкиот организам, а кои се резултат на работата на системите и органите. Звучни бранови емитираат: срцевата акција, движењето на крвта низ крвните садови, струењето на воздухот низ белите дробови и душникот и перисталтиката на цревата. Промените во звучниот спектар на пооделни органи во текот на разни заболувања, споредбено со звучниот спектар на здрави органи има голема дијагностичка вредност. Апаратот за наслушување на таквите звучни бранови се вика стетоскоп. Стетоскопот е еден од најстарите медицински инструменти кој денес, благодарејќи на електрониката, станува дијагностичка алатка со голема моќ и прецизност.