Со стандардите од секаков вид се среќаваме на секој чекор во секојдневниот живот. Тие постојат за да ги унифицираат соодветните карактеристики на некој производ, со што ќе се обезбеди и негово поевтино производство, лесно и долготрајно користење, како и заменливост, односно компатибилност, кога се работи за ист вид производи од различни произведувачи.
Постоењето на стандардите е поврзано со согласноста на произведувачите или нивното наметнување од страна на некоја авторитетна организација, која може да биде на државна, може да биде од регионален карактер, или пак од глобален. Стандардите можат најдобро да се опишат како комплет од договори меѓу неколку странки. Според тоа, стандардите претставуваат компромис кој ја ограничува слободата на учесниците.