Кога се прави анализа на уредите кои ги содржи едно студио, сегогаш вниманието е свртено кон камерите, аудио и видеомиксетата, светлото... Но, постојат уреди кои од технолошки аспект не го свртуваат вниманието, но се многу битни за квалитетот на целокупниот производ, било тоа да е шоу програма, квиз, играна програма или вести. Такви уреди има повеќе, а во овој текст ќе стане збор за телепромптерите или како што е одомаќено на нашиве простори едно мошне неубаво име "идиот". Името е дадено со лоша намера, дури и навредлива, а сака да се потенцира дека пред камера можат да застанат и да зборуваат и луѓе кои немаат добра меморија, кои не се елоквентни итн. Во сето ова нема вистина, бидејќи телепромптерот е уред кој му помага на оној пред камерата да изгледа самоуверено, да воспостави близок контакт со гледачите, а не да мисли само на текстот и на податоците кои мора да ги каже. Отпор кон овој уред имаше и во Македонската телевизија, која беше прва и единствена телевизија на овие простори во седумдесетите години на минатиот век. Презентерите го одбегнуваа плашејќи се од реакцијата на колегите и другите структури да не помислат дека не ги бидува, па им се потребни помагала од овој тип. Сè се смени кога стигна информација дека во рускиот парламент се набавени неколку вакви уреди и дека нив ги користи претседателот на владата и министрите. После оваа информација сите го бараа и беа многу лути ако некогаш имаше дефект и не можеа да го користат.