Ако временската машина ја вратиме неколку децении наназад ќе видиме дека на автомобилскиот пазар се имаат појавено возила кои уште во своето време станаа легенди, феномени или начин на размислување и стил на живеење. ќе споменам само некои од нив: Порше (Porsche) 911, Спачек (Citroën 2CV), VW Буба, NSU. За сите овие возила заедничко е што ладењето на нивните мотори е воздушно. Пиететот кон овие возила ми налага во оваа прилика накратко да се осврнам токму на нивната заедничка карактеристика, а тоа е воздушното ладење на нивните мотори. Кај некои од нив (пр. Порше 911) воздушното ладење на моторот стана и еден од заштитните знаци токму заради фактот што им пркоси на законите на физиката. Меѓутоа, постои и друга причина за запознавање со овој вид на ладење на моторот, а таа е што денеска се во фаза на експериментирање комбинирани системи за ладење, т.е. такви системи кои се ладат истовремено и преку разладна течност и директно со воздух.