За секого овој јапонски збор има значење на самоубиец, што е вистина, меѓутоа овие самоубијци својот живот го жртвувале од едни многу повозвишени причини. Луѓето, коишто како "камиказе" го положувале својот живот за татковината не го правеле тоа од очај, туку поради својата чест, невидена гордост, патриотизам и самопожртвуваност. Тие го наведувале својот воздухоплов кон непријателската цел, и со еден удар во него сметале дека ќе се оддолжат на својот татко – Императорот, татковината и ќе се спојат со вечноста. Тие се сметале за наследници на некогашните самураи, кои биле спремни до последен да изгинат во бој, но својот живот не го предавале на противникот, затоа што тоа би претставувало предавство кон својот господар, кој бил божје чедо, својата татковина, семејството и семејната чест. Во текот на самоубиствените мисии не е забележан случај пилотот да го напушти воздухопловот пред тој да удри во целта, што дополнително ја прикажува фанатичната природа на камиказите.