Оваа година е Меѓународна година на астрономијата прогласена од УНЕСКО. По тој повод ЕМИТЕР ќе се обиде да ја приближи астрономијата до читателите со повеќе пригодни статии, како и со овој курс за астрономи - почетници. Модерната астрономија го истражува целиот универзум и неговите различни форми на материја и енергија. Масите и димензиите на астрономските објекти обично се огромни, но за да ги разбереме нивните карактеристики, се проучуваат и најмалите делови од материјата, молекулите, атомите и елементарните честички. Густините, температурите и магнетните полиња во универзумот можат да бидат многу пати поголеми од граничните вредности што можат да се достигнат на Земјата. Унивезумот е огромно поле за проучување, не само поради својата големина, но и поради вариететот на објектите и феномените кој што се дел од него.