Иако живееме во векот на електрониката за многумина таа претставува мистерија. Колку повеќе сме опкружени со разни електронски "чуда" толку поголема е желбата, но и стравот да се "ѕирне" во нивната внатрешност. Оваа серија написи е наменета за оние кои сакаат да влезат во светот на практичната електроника. Следејќи го овој наш курс брзо ќе сфатите дека не е неопходна инженерска диплома за да можете самостојно да изработите некој корисен електронски склоп или да поправите некој електронски уред. Според нашиот план оваа серија треба да има 11 продолженија во кои на пристапен начин ќе бидат објаснети најнеопходните работи што, за почеток, треба да ги знае секој електроничар. Напоредно или во склоп на оваа серија ќе бидат објавени и неколку проекти за самоградба на едноставни, но корисни електронски склопови. Се надевам дека со оваа серија написи ќе успееме да пополниме барем дел од огромната празнина што постои во Македонија на полето на практичната едукација во електрониката и дека многу идни електроничари своите први чекори во светот на електрониката ќе ги направат со помош на ЕМИТЕР и овој курс. Во овој број продолжуваме со објаснување на основните поими и закони во електрониката.