За вибрациите во каблите и проблемите кои поради тоа се јавуваат најмалку се знае. Не само затоа што каблите се (веројатно) најмалку осетливи на нив, туку пред сè затоа што многу малку аудиофили се свесни за фактот дека вибрациите на кабелот можат да ги деградираат особините на аудио сигналот. За ова сведочат многу аудиофили ширум светот. Некои од нив, а тука претежно се работи за звучнички кабли, толку се осетливи на вибрации, што звучните одеци на нивното посилно физичко потресување можат да се слушнат и низ звучниците како високотонска осцилација. Се разбира, тоа се екстремни случаи на микрофонија, меѓутоа тие се само драстичен показател како каблите реагираат на микровибрациите на кои скоро ниеден кабел не е имун. Повеќето вибрации кабелот ги "собира" од подлогата на која се потпира (под, полица, статив и сл.), а размерно помалку е осетлив на акустички предизвиканите вибрации.