Дали сме способни да ја следиме сопствената еволуција? Прашањето е можеби малку чудно но сосема на место. Нема да дискутираме за тоа колку модерната технологија нè прави подобри или сосема спротивни на оваа пријатна слика за нас самите, туку за трката во која сите (повеќе или помалку) учествуваме, свесни дека нема да можеме за долго да го пратиме темпото, а трката е сè побрза, всушност како што стојат работите штотуку започна. Аудио индустријата се чини дека дури сега почнува да ги разоткрива своите тајни (и тоа е прашање), иако само до неодамна најавуваше дека е сосема блиску денот кога дефинитивно ќе бидат избришани сите разлики и недостатоци на аналогната и дигиталната технологија, и барем за одреден период ќе можеме да и се препуштиме на вистинската причина поради која толку жестоко се "кршат копјата" меѓу производителите и конзументите на аудио опрема, задоволството наречено слушање музика.