Со еквилајзерите може да се влијае врз амплитудите на различните фреквенциски компоненти од аудио спектарот. Тие претставуваат една многу корисна алатка при обработката на аудио сигналот. Затоа се наоѓаат вградени во речиси секоја тонска миксета, но, обично, во "посиромашна" варијанта, што се однесува до можностите. Со многу повеќе можности, па дури и "раскошни", се градат како посебни уреди кои можат да бидат уфрлени, односно инсертирани, на патот на аудио сигналот. Денес се среќаваат и аналогни и дигитални еквилајзери, секој со своите предности. При тоа е видливо настојувањето на конструкторите на дигиталните еквилајзери да ги задржат не само добрите особини на аналогните, туку и логиката на расудување и нивната оперативност. Се разбира, со истакнување на многуте оперативни можности на дигиталните еквилајзери. Еквилајзерите што се прикажани во овој напис, еден аналоген и двата дигитални, даваат можност за споредување.