Сакам да го изработам терморегулаторот за лемило TRB-v2.01 oд Емитер 2/2002. Ме интересира со колкава моќност треба да биде трансформаторот бидејќи пишува дека треба да биде од 220V на 24V меѓутоа моќноста не ја пишува. Исто така, имам трафо од 19V па ме инетерсира дали ќе може да ми врши работа за овој уред. Што ќе изгубам? Дали ќе се продолжи само времето на греење?
Никола Николовски

Со оглед на тоа што грејачот на лемилото има моќност од 48W трафото треба да има 50W, а може и повеќе. Ако се употреби трафо за 19V сметам дека само ќе се зголеми времето потребно да се загрее лемниот врв, и со мала веројатност е дека нема да може да се достигне максималната температура од 480°C.
Благој Ќупев

Го изработив уредот со трафото од 19V но лемилото не може да ја постигне максималната температура од 450°C. Дали 17mV на J1 значат 450°C бидејќи со оваа вредност на врвот на лемилото со мултимер мерам околу 200°C и калајот едвај се топи. Со P1, P2 и P3 во крајна десна положба добивам некои 280°C и околу 19mV на J1. Претпоставувам дека ова значи дека не можам да го користам ова трафо?
Најдов и трафо од 24V но и со него моето лемило никако да се доближи до посакуваната температура од 450°C. Дали на тријакот TR1 треба да има ладилник? За P1 и P3 наместо вредностите што ги пишува ми дале за P1 од 47K оми, а за P3 од 470. Колку треба да биде вредноста на P3 бидејќи во Емитер пишува само 300?
Никола Николовски

Со трафо за 24 волти дефинитивно можете да ги добиете посакуваните 450°C па и повеќе (внимавајте да не го прегреете лемилото затоа што може да настане негово трајно оштетување).
Не можам да ви кажам колкав треба да биде напонот на сензорот при 450°C затоа што го немам лемилото кај мене, но сепак мерењето на температурата на врвот мултиметарот би требало да покаже добри вредности (максимална температура околу 450°C).
Вредноста на потенциометрите треба да бидат според шемата, но и мало отстапување не е проблем. Според правилата за означување во електронските шеми ознаката 300 значи 300 оми, но воопшто не е проблем тоа што имате вградено од 470 оми.
Тријакот не треба да биде поставен на ладилник иако се загрева при работа. Едно време се појавија тријаци со сомнителен квалитет кои не можеа да ги пропуштат двете полупериоди од напојувањето при побуда само од прв квадрант, па веројатно истиот проблем го има и кај вас – во овој случај лемилото се напојува со 50% од моќноста на трансформаторот и не може да ја достигне максималната температура.
Значи, за да проработи уредот како што треба, заменете го тријакот со нов (иста ознака како во шемата и не земајте замени за него) или побарајте т.н. logic level triac тип.
Благој Ќупев