Почитувани,
Се извинувам што одземам дел од вашето време и однапред благодарам за вашата помош.
Го имам изработено проектот 500 W Излезен засилувач од ЕМИТЕР 3/98. Пред некое време решив да ја довршам изработката на проектот Заштита за звучници од ЕМИТЕР 2/99. Во текстот е назначено дека уредот се напојува на напон поголем од 15V и дека истиот се приклучува на напојувањето од излезниот засилувач (како што е и прикажано на сликата во списанието), бидејќи повеќето засилувачи користат напон поголем од 15V. Прашања:
1. Бидејќи засилувачот што го имам изработено се напојува со напон од 43V и сметав дека тоа е голем напон, планирав истиот да користи напојување од посебен трансформатор. Дали тоа би било правилно, за да може уредот да функционира?
2. Наведено е дека релејот треба да биде 15V/2A, но на повеќе места каде што прашав имаат само 12 и 24V, па затоа нарачав 12V/5A. Дали таков ќе функционира?
Однапред Ви благодарам за одговорот.
Марјан Марковски, Кавадарци

1. Колото за заштита на звучници е предвидено да се напојува од истиот извор на напон со кој се напојува излезниот засилувач. Нема потреба од посебно напојување. Сè што треба да направите е да ја пресметате вредноста на отпорникот R14 и неговата моќност според формулите што се дадени на крајот од текстот. Вредноста од 1kΩ е добра почетна вредност, но ако има потреба (зависно од отпорноста на релејот RE1) истата може да се коригира.
2. Колото заедно со релејот што сте го нарачале ќе функционира без проблеми доколку е правилно димензиониран отпорникот R14. Aко тоа веќе сте го направиле според упатствата кои се дадени во текстот (и одговорот под 1), тогаш слободно можете да го монтирате на плочката.
Дејан Трпески