Здраво Почитувани,
Јас сум ваш редовен читател уште од далечна '95 година кога го видов првиот број на ЕМИТЕР во трафика и не верував што гледам. Пофалби и коментари се излишни, ЕМИТЕР пројде Содома и Гомора но тоа го направи уште подобар (What doesn't kill you only makes you stronger). Ордени за храброст за господата Таневски и Филевски, а за сите оние душегризници кои велеа и велат дека ЕМИТЕР забегал од својата концепција едно големо НЕ! Тоа не е така. Секој еден што ја сака електрониката, или било која друга наука, не може и не смее да остане рамнодушен кон други научно-технички области, или можеби јас имам проблем да ги разберам тие луѓе кои патем и порано, а и сега не наоѓаа за сходно да одделат 100-тина денари месечно туку го фотокопираат. ЕМИТЕР-от е одличен и нема што да се додаде на тоа.
Една забелешка до господинот Пулчевски во врска со неговиот напис во ЕМИТЕР 09/04 на стр. 9 со наслов "Системски фајлови на интернет". Написот во секој случај дава корисна информација, но има две кардинални грешки. Прво невозможно е да форматираш активна партиција (партиција на која се наоѓа оперативниот систем) доколку немаш системски диск, било флопи или ЦД, тоа би било аналогно на сечење на гранка на која седиш. Второ доколку тоа веќе и би ти успеало (постои начин познат на 2% компјутерска популација), невозможно е од "табула раза" хард диск да се конектираш на интернет :). Цитирам "Доколку немате системска дискета и нема каде да направите, тогаш решението е www.bootdisk.com".
Би сакал да дадам еден предлог. Да се објави проект за изработка на амплитудно модулиран радио приемник кој што би работел во опсегот на цивилна авијација (118-136 MHz). За ова има доста материјал на интернет, но треба да се обработи за што јас лично не сум доволно подготвен. Од правна страна гледано не постојат никакви пречки за употреба за таков приемник, а верувам дека многу читатели би биле заинтересирани за тоа што се се случува за време на еден лет на комерцијален патнички авион.
Многу поздрави,
Александар Андоновски
Голема благодарност за убавите зборови за ЕМИТЕР - тие се вистински поттик за нашата натамошна работа.
Вашите констатации во врска со неможноста да се конектирате на интернет од компјутер кој има неисправен Windows или пак форматиран системски диск се потполно исправни. Но спомнатиот текст не ни наведува дека конекцијата треба да се направи од тој компјутер - едноставно се подразбира дека потребните системски фајлови ќе ги сименете од наведената веб адреса од некој друг компјутер кој има конекција на Интернет :-).
А во врска со предлогот за проект за приемник за воздухопловниот банд можам да ве израдувам дека тој наскоро ќе биде реализиран. Имено уште пред неколку месеци во редакцијата се договоривме да подготвиме и објавиме проекти за 3 радиоприемници – првиот, за радиодифузното ФМ подрачје (88-108MHz), веќе го објавивме во ЕМИТЕР 12/04, а потоа ќе следат и приемниците за воздухопловниот банд (над 108MHz) и за подрачјата под 80MHz. Ако имате уште некој предлог, слободно изложете го.
Слободан Таневски
Почитувана редакцијо!
Заитересиран сум за изградба на далечинската контрола за радио командувани модели и имам неколку прашања околу неа:
1. Хибридите ги побарав на неколку места, но безуспешно. Во Емитер 7-8/04 рековте дека дел од нив можат да се набават во Електронинвест во ТЦ Бисер, но контакт телефон во Емитер нема, па како можам да го добијам.
2. Дали хибридите употребени во вашиот модул се купени од Електронинвест, а ако не ве молам да ме упатите каде можам да ги најдам.
3. Во врска со досегот. Колкав досег има модулот и што може да се направи за да се зголеми истиот, да речеме на околу километар-два? Доколку може ве молам да ми испратите шема со дополнителни измени доколку ги има, или треба да се употребат други помоќни хибриди?
4. Сакам да употребам помоќни мотори. Во текстот имате напишано дека за ова треба да се употребат релеи преку кои ќе се врши напојувањето. Но како?
За крај, списанието во целост ви е супер, темите што ги обработувате се одлични и само продолжете така.
Стојан од Кичево
Благодариме за пофалбите и интересот за нашите проекти.
1 и 2. Хибридите употребени во проектот пред повеќе години се набавени од Маплин (www.maplin. co.uk). Во Електронинвест можат да ви помогнат да ги набавите истите или пак да ви предложат слични. Нивниот телефонски број е 02 245-0437, а за него не сте морале толку долго да чекате да го добиете од нас, туку сте можеле да го добиете од сервисот за телефонски информации.
3. Досегот на уредите зависи од конфигурацијата на теренот и напојувањето. Согласно производителот на модулите, тие во идеални услови треба да обезбедат досег од 300m. Секако дека во затворени простории таа вредност драстично ќе се намали. За нивно засилување потребно е да се изгради или набави дополнителен засилувач, но во моментов не би можеле нешто конкретно да ви предложиме, бидејќи тоа треба најнапред да се проба. Сепак станува збор за пренос на податоци, а не на обичен говор. Може да се упортебат и хибриди со поголеми моќности, но ние не располагаме со информации за такви кои лесно би се имплементирале без некои големи модификации на уредот.
4. Доколку сакате да употребите помоќни мотори, покрај со релеи нивното напојување можете да го изведете и преку транзистори. Има неколку решенија и за двете комбинации кои можете да ги видите во некои други проекти објавени во ЕМИТЕР. Еве како тоа би изгледало со релеи. Ќе ви бидат потребни по два релеа за секој мотор. Релеите за моторот МОТ1 треба да бидат управувани од пиновите 18-17 и 16-15 на IC3, а релеите за моторот МОТ2 треба да бидат управувани од 14-13 и 12-11 од IC3. Релеите треба да се поврзат така што на моторите МОТ1 и МОТ2 ќе им даваат напон на ист начин како кога моторите би биле врзани како што е прикажано на шемата.
Добре Блажевски
Здраво, Емитер
Би Ве запрашал за совет. Имено, имам засилувач со карактеристики: 2X40W, фреквентен опсег од 20Hz до 20kHz на оптоварување од 4 ома. Потребни ми се звучни кутии кои ќе ги задоволат овие карактеристики. Исто така може да дојде предвид самоградба доколку добијам од Вас такви препораки и нормално доколку тоа е поевтино. Би Ве замолил за Ваше мислење и препорака што се однесува на готовите кутии и самоградбата. Ако имате податоци за цени и дистрибутери на ваква опрема ве молам ако сте во можност пратете ми ги.
Поздрав, Александар
Бидејќи Вашиот засилувач може да работи на 4 ома, на него може да се приклучи која било звучна кутија. Евтин, а одличен звучник е B&W DM 303, кој можете да го купите во "Аудио центар" по цена од околу 280 евра (за пар). Постојат и други, поевтини комерцијални звучници од B&W DM 303, но нивниот звук е забележливо полош. Сепак, ако 280 евра Ви се премногу, слушнете ги ELTAX Symphony 2.3 или Milenium 100, кои можете да ги купите кај ZEC Electronic по цена од 6000 денари (за пар), кои даваат сосема солиден звук за нивната цена. Се разбира, ако имате вешти раце, можете да пројдете уште поевтино со некој од проектите за звучни кутии објавени во ЕМИТЕР - го препорачувам проектот Транс 6.5 од ЕМИТЕР 7-8/03.
Владимир Филевски