Кога ќе влезете во студиото ЖЛУСТ ќе наидете на потфат за почит: сложна дружина студио изградила и тоа сé со љубов и со внимание. Просторот не е мал, дури би рекол и голем за наши услови, исполнет со инструменти и помошни направи. Режијата, вметната во еден агол од студиото, исполнета со миксетата, рекови за различните уреди за обработка на аудиосигналот и контролните звучни кутии, гледа кон студиото преку прозорец кој не е направен според познатите студиски строгости, туку е од стандардно индустриско производство, но со доволно изолација за да може непречено да се работи. Впрочем, студиото повеќе е правено за свој ќеф, без намера за комерцијализација, иако и таа, очигледно, почнала да навлегува.