Издавачката програма „160 дела. 160 недели“ на КЛИК е-издаваштво, започната во јули годинава, досега резултирала со објавување 21 книга, а активностите продолжуваат со нови авторски изданија и институционални соработки. До крајот на октомври биле реализирани 17 библиографски регистрирани публикации, кои опфаќаат вкупно 22 книги.

Проектот е дел од пошироката издавачка и дигитална платформа во која се поврзани КЛИК е-издаваштво, е-Библиотека Паноптикум и порталот Panoptikum.mk. Целта е македонското книжевно творештво да добие поголема видливост и да стане подостапно за читателите, независно од тоа каде живеат.

Програмата започнала со систематско објавување на книжевниот фонд на писателот и новинар Љупчо Димитровски, создаван во текот на повеќе децении. Меѓу позначајните изданија се поетското дело „Во заумност сосе стварност“, кое обединува шест самостојни книги поезија, и романескната пенталогија „Јава од искони“, составена од пет романи. Објавени се и збирката од сто раскази-ескизи „Во време за приказ“, „Мои народски изреки I – дума, опит, ука“, со 1000 авторски изреки, како и други поетски и прозни дела.

Важен дел од активностите е и дигиталното оживување на книжевното наследство. Преку соработката со ЈУ Градска библиотека „Браќа Миладиновци“ – Скопје, во е-Библиотека Паноптикум бесплатно се достапни дела како „Бели мугри“ од Кочо Рацин, „Бегалка“ од Васил Иљоски, „Крвава низа“ од Славко Јаневски и „Песна на црната жена“ од Ацо Шопов.

Меѓу поновите примери е и еколошката бајка „Скршениот шестар“ од Тони Манџуковски – Манџук, која на 9 ноември 2026 година, точно 25 години по првичната промоција, повторно им е претставена на читателите, овојпат во дигитална форма.

Ново поглавје во развојот на платформата е соработката со Агенцијата за иселеништво. На 3 ноември е потпишан Меморандум за соработка, а два дена подоцна Агенцијата објавила повик до македонските автори, литературни друштва и културни организации во иселеништвото за вклучување во иницијативата.

Предвидено е дигитално претставување на постојните книги, монографии и други публикации поврзани со македонското културно наследство, како и можности за професионално електронско издавање нови ракописи. Соработката опфаќа и медиумско претставување на културните активности и творештвото на Македонците ширум светот.

Е-Библиотека Паноптикум функционира како платформа за онлајн читање, преку која корисниците можат да пристапат до книгите од компјутер, таблет или мобилен телефон. Во зависност од условите на конкретното издание, книгите се достапни бесплатно, со купување или преку членство. Платформата развива и аудиосодржини, меѓу кои е обновениот серијал „Јазикот е мојата татковина“, составен од 52 емисии посветени на македонскиот јазик.

Издавачката програма продолжува со најавеното темпо од едно ново издание неделно. Амбицијата е во наредните три години македонските автори и нивните дела да добијат континуирано место во дигиталниот книжевен простор, а книгите да стигнуваат до читателите и надвор од границите на државата.