Тимот на Safe Trace, составен од три 17-годишни ученички – Бисера Дрндар, Ана Костуранова Денковски и Мија Костуранова Денковски, го освои првото место и наградата од 500 евра на хакатонот SheSafe Online што се одржа во Скопје. Нивното решение „Дигитален Чувар“ е платформа поддржана со вештачка интелигенција што им помага на корисниците да ги разберат и заштитат своите дигитални идентитети, анализирајќи јавно споделени информации и покажувајќи преку интерактивна Ripple Map како навидум безопасни објави можат да откријат чувствителни детали. Жирито го гласаше решението за најдобро на настанот.
Второто место и наградата од 250 евра ги освои тимот Curly Burrito, Мануела Наумовска и Тамара Нешовска, со прототипот SafeWalk, апликација што им помага на жените да избираат побезбедни пешачки рути врз основа на податоци од заедницата, со поддршка за македонски, српски и албански јазик.
Победниците на хакатонот SheSafe Online
„Импресионирани сме од зрелоста и општествената свест на овие млади луѓе. Тие не решаваа апстрактни проблеми, тие развиваа технологија што одговара на реални ризици со кои се соочуваат жените и девојките секој ден“, изјавија организаторите.
Хакатонот SheSafe Online, одржан во Startup Club Скопје, собра 20 млади иноватори на возраст од 17 до 25 години, од кои 95% беа жени, кои во текот на 36 часа развиваа технолошки решенија за заштита на жените и девојките од дигитално насилство. Сите седум тимови ги презентираа своите решенија пред стручно жири на Demo Day, работејќи на три реални сценарија на родово базирано насилство и онлајн ризик: безбедна и скриена комуникација под дигитален надзор, итен и дискретен повик за помош на јавно место, и препознавање на онлајн манипулација кај младите.
Тимот што го освои второто место на хакатонот
Учесниците добија менторство од професионалци во технологија, социјални иновации и поддршка за жртви, а нивните решенија ги оценуваа специјалисти од АСТРА, ICT Hub Белград, Business Impact Lab, Технолошко-металуршкиот факултет (УКИМ) и Отворена порта – Ла Страда Северна Македонија.
Оваа активност е организирана од страна на АСТРА – Акција против трговија со луѓе и ICT Hub во рамките на регионалната програма „ЕУ за родова еднаквост: економско зајакнување на жените и спречување на насилството врз жените“, финансирана од Европската Унија и заеднички спроведувана од UN Women и UNDP.
