Напредните верзии на популарните модели на вештачка интелигенција, Gemini 2.5 и GPT-5, постигнаа извонреден успех на Светското финале на Меѓународниот натпревар за колеџ програмирање (ICPC), при што двата модели постигнаа резултати на ниво на златен медал за оваа година.

Натпреварот ICPC се одржа во Баку на 4 септември и собра 139 врвни тимови од речиси 3000 универзитети од повеќе од 100 земји низ целиот свет. За време на петчасовното натпреварување, студентските тимови се натпреваруваа и со модели на вештачка интелигенција, кои живееја во оддалечена онлајн средина според правилата на ICPC. Резултатите беа доминирани од GPT-5 на OpenAI со можности за длабоко расудување и верзијата Gemini 2.5 Deep Think.

Моделот на Google правилно реши 10 од 12-те алгоритамски проблеми. Доколку се натпреваруваше како универзитетски тим, со ова ќе го освоеше високото второ место во генерален пласман. Моделот на OpenAI се покажа малку подобар во генералниот пласман, решавајќи ги сите 12 проблеми и постигнувајќи подобар резултат од кој било од студентските тимови.

Гугл изјави дека ова достигнување уште еднаш го истакнува значајниот исчекор во способноста на Џемини да решава апстрактни проблеми, а се надоврзува на неодамнешниот успех на нивниот модел кој покажа вештини на ниво на златен медал и на Меѓународната математичка олимпијада (IMO) одржана пред два месеци.

Тимот на Google особено го истакна фактот што нивниот Gemini успешно и ефикасно го реши таканаречениот Проблем C во првите половина час, задача што ниту еден од универзитетските тимови во натпреварот не можеше да ја реши. Проблемот бараше наоѓање на оптимална конфигурација за дистрибуција на течност преку мрежа од поврзани канали до серија резервоари, со цел сите резервоари да се наполнат во најкраток можен рок. Поради бесконечниот број на можни конфигурации, проблемот претставуваше извонреден предизвик, а Gemini го реши со иновативна примена на напредни алгоритми и теореми. Ова, велат тие, ја покажува способноста на моделот за длабоко апстрактно расудување, креативност и за синтеза на нови решенија за претходно невидени проблеми.

Недолго по објавата на Google, се огласија и од OpenAI, велејќи дека нивниот GPT-5 модел го решил и овој „нерешлив проблем“. Тие, од друга страна, се „мачеле“ со друга задача, Проблем G, во кој GPT-5 не можел да најде одговор, па затоа бил активиран дополнителен, експериментален модел, кој успешно го совладал. Проблемот G го решил, со модели на вештачка интелигенција, само еден универзитетски тим, кој на крајот победил во натпреварот меѓу луѓето. Станува збор за тимот на Државниот универзитет во Санкт Петербург.

OpenAI додава дека ова достигнување сведочи за универзалноста на моделите на расудување, бидејќи нивниот GPT-5 модел е идентичен со оној што се извршуваше во IMO и е достапен за крајните корисници, а не е специјално обучен за проблеми со програмирање типични за ICPC.