Утре, 15 јули, на паркингот од кампусот на техничките факултети во Скопје официјално ќе биде претставен болидот изработен од тимот на MES Racing со којшто тие ќе учествуваат на годишниот натпревар Формула Студент што овој август ќе се одржи во Хрватска. Се работи за едукативен инженерски натпревар кој има за цел да развие претприемнички дух и нова генерација на иновативни млади инженери. Се смета за еден од најафирмираните едукативни натпревари за мотоспорт во светот.
Во рамките на натпреварот Формула Студент, што во континуитет се одржува веќе 26 години, универзитетски студенти ширум светот формираат тимови за да дизајнираат, изградат, тестираат и да се тркаат со мали тркачки автомобил во стил на формула. Овие тимови често се состојат од студенти од различни инженерски дисциплини, вклучувајќи машинско, електро и софтверско инженерство. Формула Студент е многу повеќе од едноставен автомобилски натпревар – тоа е платформа каде студентите по инженерство имаат можност практично да го применат своето знаење во конкурентна средина, што ќе ги подготви за нивините кариери во сферата на инженерството и технологијата.
Имено, предизвикот не е само да се направи брз болид, туку се оценува и дизајнот, инженерството и издржливоста на автомобилот. Натпреварот бара од студентите да испорачаат сеопфатен пакет кој вклучува дизајн, перформанси и финансиско планирање.
Вообичаено Формула Студент инкорпорира серија од статични и динамични настани. Статичните настани може да вклучуваат презентации на дизајн, анализа на трошоците и деловни презентации, каде тимовите го прикажуваат својот проект на потенцијални инвеститори. Динамичните настани обично го вклучуваат самиот автомобил, вклучувајќи забрзување, лизгање, автокрос, економичност на гориво и тестови на издржливост.
Формула Студент настаните се одржуваат ширум светот, при што најреномираните се случуваат во земји како Британија, Германија, САД и Австралија. Овие настани често се поддржани од автомобилската и мотоспортската индустрија. Многу професионалци од автомобилската и мотоспортската индустрија се вклучени во Формула Студент, обезбедувајќи менторство на тимовите и се дел од комисијата за оценување на натпреварот. Ова им дава на студентите вредна можност да се поврзат и да учат од искусни инженери.
Формула Студент е високо ценет поради неговото инженерско искуство во реалниот свет. Тој им нуди на студентите практично искуство во дизајнот, инженерството, тимската работа, менаџментот и финансиите, од кои сите се многу корисни за нивните идни кариери.
Македонскиот тим MES Racing, кој оваа година учествува на натпреварот Формула Студент, е посветен и страстен тим составен од 20 студенти од три факултета од кампусот на Универзитетот Св. Кирил и Методиј во Скопје – Машинскиот факултет, Факултетот за електротехника и информациски технологии и Економскиот факултет. Тимот има за цел да го создаде првиот македонски тркачки автомобил во стил на формула од мали размери, покажувајќи ја инженерската моќ на нашата земја на меѓународната сцена.
“Со изградбата на овој автомобил, имаме за цел да ги поставиме темелите за идните генерации, обезбедувајќи им солиден проект на кој ќе работат и напредуваат. Ние силно веруваме во промовирање на различноста и инклузивноста, особено преку вклучување на жените во мотоспортот и инженерството. Одржливоста е уште еден фундаментален аспект на нашиот проект и ние даваме приоритет на повторна употреба на делови и минимизирање на отпадот преку рециклирање. Дополнително, ја нагласуваме нашата еколошка одговорност со користење на еколошко гориво како што е E85. Преку овие цели, се стремиме да оставиме трајно влијание врз заедницата на моторспортот, образованието и животната средина”, велат од тимот.
MES Racing ќе се натпреварува во Хрватска со болид кој има погон на согорување од моторцикл, конкретно Yamaha Fazer, кој треба да се интегрира во болидот, а притоа да ги исполнува сите зададени регулации. Од 3-тата година па натаму, во план е да се започне и со изградба на електричен болид, кој би имал способност за автономно управување. Исто така, целта е да се организираат и јавни едукативни натпревари, каков што беше тридневниот натпревар на кој натпреварувачите беа предизвикани да го истражат и иновираат аеродинамичниот дизајн на болидот, во рамки на регулативите од Формула Студент, со цел да се подобрат перформансите на возилото. Ова вклучува примена на принципите на аеродинамика за намалување на отпорот на воздухот и подобрување на агилноста и стабилноста на автомобилот.
На натпреварот можеа да се пријават и средношколци од четврта година и студенти на државни и приватни универзитети кои се љубители на Формула 1, кои беа поделени во три тима. Натпреварот доби поддршка и од врвниот македонски возач во мотоспортот Игор Стефановски – Иџе, кој достигна слава во светски рамки.
На презентацијата, која започнува во 19,30 часот, присутните ќе имаат можност да се запознаат со членовите од македонскиот формула тим и од прва рака да се запознаат со детали од проектот.