Низ целата историја на цивилизацијата постоеле луѓе кои можеле да ја согледаат суштината на светот многу подалеку од сопствениот двор, незаслепени од огромното богатство што го имале. Тие луѓе во времето на ренесансата биле познати како мецени, луѓе кои финансиски ги поддржувале уметниците и научниците. Без нив денес не би знаеле за Леонардо да Винчи, Микеланџело, Исак Њутн и многу други уметници, пронаоѓачи и научници. Во групата на тие луѓе денес повеќе познати како филантропи спаѓаат соосновачот на Мајкрософт Пол Ален (Paul Allen) и Натан Мурволд (Nathan Muhrvold) поранешен шеф на технолошкиот оддел на Мајкрософт. Тие заедно на СЕТИ Институтот му донираа 12,5 милиони долари за изградба на огромна низа од мали радиотелескопи, компјутерски поврзани меѓусебе, кои ќе служат како технолошко уво за следење на интелигентни сигнали од вселената.