Изработката на овој уред е иницирана од потребата во мал простор да се смести инструмент кој последователно ќе го испишува напонот на неколку (во овој случај осум) мерни напонски точки. Ова е алтернативно решение за поставување на осум независни волтметри, кои го прикажуваат напонот што го мерат. Често недостатокот од простор условува непостоење на можност да се инсталираат осум волтметри, па затоа овој уред би бил одлична замена за нив. Потребата од следење на напонот на повеќе точки одеднаш најмногу е изразена во индустријата каде за потребата на даден процес истовремено се следат неколку параметри кои се менуваат бавно. Така, најчесто се следи температурата во неколку точки истовремено, но промената на температурата не е брза, што значи дека од едно до друго прикажување на напонот на даден канал нема поголема промена. За да се следи температурата со помош на овој уред е потребен и соодветен претворувач на влезните големини од температурните сензори во напон кој одговара како влез за овој уред. Исто така, може да се направат и соодветни претворувачи кои влезната информација за притисокот во некоја точка ќе ја претворат во напон соодветен на влезовите од овој уред. Така, со помош на дополнителни претворувачи може на еден дисплеј да се прикажат повеќе разновидни големини.