Самиот поим хидроизолација буквално значи заштита од вода. Во принцип можно е да се направат повеќе поделби како на подземна и надземна заштита. Втора поделба би била заштита од атмосферска вода, како на подземни така и на катни конструкции, и заштита од санитарна вода која се користи секојдневно во домаќинствата и индустријата. Хидроизолацијата како важен сегмент при изградбата на сите објекти се предвидува уште во самиот идеен проект, со тоа што се предвидува секогаш употреба на компатибилни материјали. Во овој напис накусо ќе елаборирам изведба на неколку видови изолација и тоа како на темелна така и на покривна, а кои од моето досегашно искуство се најмногу присутни на нашето поднебје.