Сигнал-трасерот е уред со чија помош се бара и се проверува сигналот во некој неисправен аудиоуред. Името доаѓа од англискиот назив signal tracer, што би можеле да го преведеме како "трагач на сигнали". Станува збор за мал НФ-засилувач на моќност, кој се одликува со голема влезна отпорност, големо засилување, можност за регулација на нивото на влезниот сигнал и вградена заштита на влезот од преголеми сигнали. Напојувањето е батериско или од мрежен адаптер, излезната моќност вообичаено е мала, од редот на 0,5 до неколку вати, репродукцијата е на мал звучник или слушалки, а целиот уред (заедно со звучникот) е сместен во мала кутија. Некои модели имаат и вграден детектор или посебна РФ-сонда со детектор на АМ-сигнали со чија помош може да се испитуваат РФ-степените на АМ-радиоприемниците. Како се користи сигнал-трасерот? Подетално ќе објасниме на крајот од овој напис, а сега само накратко: на влезот од испитуваниот уред се пушта аудиосигнал, па со помош на сигнал-трасерот го следиме сигналот низ сите степени, почнувајќи од првиот кон последниот степен. Сè додека степените што ги поминуваме се исправни на звучникот ќе се слуша чист и доволно силен звук, а тогаш кога сигналот ќе го снема или ќе биде изобличен лесно ќе заклучиме дека последно испитуваниот степен е неисправен. Моја препорака е секој електроничар-почетник, па и оние понапредните кои до сега тоа не го сториле, да го изработат овој сигнал-трасер. Тој ќе ви биде од голема полза во натамошното занимавање со електрониката, а кога нема да го користите како сервисен инструмент ќе можете да го употребувате како засилувач за вашиот MP3 плеер. Посебен повик до учениците: Испратете ни фотографии од вашите изведби на овој сигнал-трасер. Фотографиите ќе ги објавиме на нашиот веб-сајт, а ученикот кој ќе има најдобра изработка (според нашето жири) ќе биде награден со годишна претплата и укоричен комплет на претходни броеви. Конкурсот трае до 31 мај оваа година.