За разлика од термисторите кои не можат директно да се користат како извршни елементи, термичките прекинувачи се исклучително погодни за таа намена. Се изработуваат практично за секоја температура, а некои производители овозможуваат и избор на хистерезисот. Сакајќи да ја избегнам потребата од нагодување на склопот за сигнализација и заштита во електронскиот товар, наместо термистори решив да употребам термички прекинувачи. За жал, во нашата трговска мрежа речиси и да не слушнале за нив. Во една продавница дури ме убедуваа дека всушност барам термостат за бојлер. Згора на сè, цената на најевтините термички прекинувачи што ги најдов на интернет е два долара по парче не сметајќи ги транспортните трошоци. Ценовникот на докажаните производители на термички прекинувачи како што се Airpax и Honeywell воопшто нема ни да го спомнам. Оние што јас ги употребив извадени се од стари, неупотребливи уреди и нивните ознаки не беа јасно читливи. Според намената на уредите сметав дека изборот е добар, но се излажав. Се покажа дека или имаат различен хистерезис, или имаат неприфатлив хистерезис, или сите четири се за различна температура или, пак, во прашање е Божја работа. И покрај тоа што склопот ја извршуваше својата заштитна улога, со текот на времето стана јасно дека се однесува необично. За да го запазам истиот принцип на сигнализација и заштита, а притоа да не морам да правам никакви измени во конструкцијата на изработениот уред, четирите термички прекинувачи ги заменив со два PTC отпорника, а релејот за наизменичен напон Re1 со DC релеј и соодветен електронски склоп за детекција на температурата. Се разбира, овојпат сите потребни компоненти, вклучувајќи ги и PTC отпорниците, ги купив во нашата трговска мрежа.